Old Tibetan
Documents Online
Google
Find on this site

Valid HTML 4.01 Transitional

Text Archives > ITJ_0740

IOL Tib J 740 (= Ch.9.II.19 = Scroll Box 140)
    This Text All the Texts photo (IDP)

1. Content : Divination with dice and a colophon.

2. Note : scroll. Complete text. Recto, a Chinese Buddhist text. Cf. Enoki (1962: C57). Verso, 359 lines. Two separate but related texts. The first text (ll. 1-237) concerns divination with dice. The second text (ll. 238-359) contains questions and replies regarding the employment of dice to settle various legal issues.

3. References :

Thomas (1957: 140-141),

Transliteration   (Change the Display Format)

(1) @@@@ @@@@ @@@@
(2) [---] [tang?] lI pyin la babste / lhe'u rje zIn tags gyI zhal nas / myI phal che nI btsan gzhi /
(3) [---] 'brIng nI rno / srI dang gcan lastsogs pa thubo lI byin 'dI lan gnyIs bab na /
(4) [---] [rabs?] gnyIs ka pardu srId myI rlago / rogs po dang mdza par 'ongste mo bzang'o
(5) @@@@ @@@@ @@@
(6) $ :/ / lha gangs po shon gangs gyI zhal nas gangs dkar po nI myI rnyil mtsho /
(7) sngon po nI myi skam / srog lhas thugs dgong mdzade tshe rIng bar 'ong dbyar gyI
(8) ldum bu dang mtshungste nor ma btsal bar gyI na rnyed / chung ma btsal bar bzang
(9) dgu gyI na' rnyede mo bzang'o /
(10) @@@@ @@@@ @
(11) $ :/ / lha myI la rgyung gyI zhal nas char yas bab na bye'u tshang du char myI bab / chu chen /
(12) po brug na zhIng myI khyar / dgra byung na dkra thub rI dags la btab na sode mo bzango /
(13) @@@@ @@@ @
(14) $ :/ / gre gre ste bran gyI ngo / nad pa la btab na bon po'I ngo / phrad dam myI phrad
(15) pa la btab na phrad 'ong 'am myI 'ong ba' la btab na myI 'ong / dgra
(16) phyva' la btab na dgra phyI dalte mo btab na mo bzango /
(17) @@@@ @@@@ @@
(18) $ :/ / ltang spu rje btsan be'i zhal nas phyag dmu dag la [pnyung?] na dmu dags rgyangs myI chad mcho chu gnyug myI 'bo /
(19) lho drug khang myI 'bub / gor phang gsang myI pskyid / myI dmu dags phyugs gyI sna
(20) dags rta'[I] srab mda' la btag na myI 'chad / srId phyva la btab na tshe rIng ste mo bzango /
(21) @@@@ @@@ @@@@
(22) $ :/ / lha thang la ya bzhur gyI zhal nas / myI khyod 'gro na nI don yod rcod ra nI tshigs
(23) yod / ngag snyan gyI nI myi [brId (/prId)] cig sa 'jam gyIs nI chu chod [cod (/bod)] cig / myI la ngandu /
(24) myI byed gyis mthar legs zhIng dge'o lhas bka' stsal pa gzha ma yundu nyondu
(25) nyon cIg / bya'Is khab sgob na lan phyI gtandu droste mthar legs zhIng dge'o mo bzango /
(26) @@@@ @@ @@@@
(27) $ :/ yar myI tIng ma galte gnam gyI mthongs bye sprin gyI go bsal / lha 'bras /
(28) mchod legs gyIs smrang gyIs myi rkur lce nad gyIs myi ldag / rI la 'gro na kha
(29) rje cheste myI dpon por 'ongste mo bzango /
(30) @@@@ @@@ @@@
(31) $ :/ rma kho rmo snyIng gI zhal nas rma chu glIng na be'u lug gsasu phel myi nad dang phyug
(32) nad gyIs 'jIgs mod gyong dgra dang myI nad phyugs nad myI 'ong gis snyIng lo mal
(33) dru phob shIg dang mo bzango /
(34) @@@@ @@ @
(35) $ :/ / lha myI la rgyung gI zhal nas rI dags sa mthon po na 'dug 'dug pa dang /
(36) ma nyes par gun gyIs bsadu brkalte ma sod nas gnas gyI steng g.yung 'drung gi
(37) shug pa drung du bros nas g.yung 'drung gI myi 'chI / myI khyod gyang lo grangs tshang bar
(38) g.yung 'drung dang 'dra'o / myI khyod gyI khyim du myi 'ong ba' kha nI snyan par zer snyIng la ni
(39) nyes par 'dzin gyIs tham pa ma mangs dang legso mo bzango /
(40) @@@@ @ @@@@
(41) $ :/ / lam lha'I zhal nas myI khyod lhas thugs rje gzIgste / zhal ces btab na yang /
(42) thar / tshong bya na yang tshong rgyal / snyIng la bdag 'dzangs snyam ma sem par lha la phyag
(43) 'tshol [dang?] snyIng la bsam ba' bzhIn 'ongste mo bzango /
(44) @@@@ @@ @@@
(45) $ :/ / lha ma bar gyI zhal nas pho'I bu nI 'gro zhIng 'za'o / mo'I bu ni 'bal zhIng /
(46) 'khal / gyod thogs pa la btab na myI zug / rgal ba' la btab na phyI dal che / tshong
(47) bya pa' la btab na myI dum / dgra phyva la btab na dgra myI 'ongste mo bzang rabo /
(48) @@@@ @ @@@
(49) $ :/ / myI lha chen po 'dra'I zhal nas / myI khyod bdag la 'dre med gyang chung dang bran
(50) la 'dre yode lha byar yos pe'I ngoste jI [bya (/pya)] dgur myI rung mo 'dI lan gnyis
(51) byung na mtha rlung gis khyer ba' dang 'draste mo ngan rabo /
(52) @@@@ @@ @@
(53) $ :/ / pya ralte srI dang gcan gyI ngoste ya bdud g.yos ma srI langs ji dgur
(54) myI rung gIs phon mkhas pas bon ma byas na myi rung te mo nganto /
(55) @@@@ @ @
(56) $ :/ / spe nyunte myI ngan chen po 'ong zhIng mdun byed pe'I ngo bya'I [phud?] [zhi?]g za zhing mgo
(57) g.yog cIng nyal pe'i ngo byungste mo 'dI lan gsum bab na mtha' rlag po' ngo
(58) byungste mo ngan rabo / / /
(59) @@@ @@@ @@@
(60) $ :/ / mu sman gyI zhal nas phral gyI sras mo gnam dgung la bzhugste 'greng
(61) myI 'o chog dang dud phyugo chogi srid mdzad pe'i stengdu gsol ba' yang gnangste mo bzango /
(62) @@@ @@@ @@@@
(63) $ :/ pu parte lha btsan po'I zhal nas lhas bkur na srog sla rjes bkur na go
(64) mtho rtas bkur na sprang yang lha la phyag 'tshol cI rje bo dang dpon po la snyIng nye
(65) bar pyo shig dang btsan zhIng skyId par 'ongste mo bzango /
(66) @@@ @ @@@@
(67) $ :/ / pya bunte srog stam chen gyI zhal nas myI ngo nI mtho dkra ngo nI dam jIs
(68) gyang ma 'jIgs par stod cIg bsam ba' bzhIn 'ongste mo bzango /
(69) @@@ @@@@ @@@
(70) $ :/ lha 'o de gung rgyal gyI zhal nas rgyal po lhas mdzad na zhal mtho / rgyal
(71) {rgyal} 'bangs rjes mdzad na go mtho lha yul na mye 'bar myI yul na glu len
(72) myI khyim na nor myI rnyede lamdu zhugste nor dang phrade mo bzango /
(73) @@@ @@@@ @@@@
(74) $ :/ gnam lha mchod legste sku khrab ma mnabsu phangsu myI bdun bkum
(75) snamru ma bdungsu bsla sha bdumbkum / yul na rta bran gyIs snam du g.yag
(76) cing / phangs na dgra 'dul cIng / yul na gnyen tshem sla ba' nya gsum ltar
(77) gongste bya rgod gzas la bcum ba' ltar dpung dang sder dragste che zhing btsan phyug
(78) cIng skyId myI dang dpaldu phrade 'dre myI 'jigs / phu dang nur tshomste dgra myI
(79) 'dzuste mo bzang rabo /
(80) @@@ @@ @@@@
(81) $ :/ / rta zhIg log par song song na rtsI chu ma ldante 'ji la thug par 'dug 'dug pa /
(82) dang / rta bla rmang pos thugs rje gzIgste lam bde ba' dang rtsI chu ldan par 'tshal te /
(83) lto 'drangs nas myI khyod gyang de dang 'draste lto 'drang nas skyId pa dang dga' bar 'ongste /
(84) mo bzango /
(85) @@@ @@@@ @@
(86) $ :/ / lha dbyar mo thang gI zhal nas lha lan rgyangs dang su sa gnyIs mjalte /
(87) khar rje thang po'I lug ra'i mdab na bye'u gcIgi tshang phrug tsharte ma dang mnyam /
(88) par zas btsal nas lto 'drangste dbyar /
(89) gyI rtsva sngon po skyeste rtsva la za'o chog srog chag rnams dga'o myI khyod gyang de dang /
(90) mtshungste lan myI chung gis mo bzango / /
(91) @@@ @ @@
(92) $ :/ skyung mu galte dmangs gyI gnam mthong chungu bye da' ltar dpul zhIng sdug
(93) pa ltar byed mod gyong gom phang phyI phyIr mtho zhIng mo bzango /
(94) @@@ @@@ @@
(95) $ :/ / ru ragste gar yang myI 'groste khyim na 'dug pe'i ngoste / gsol ba' dang /
(96) grog la btab na mar khu gzhong bu gang tsam rnyed pe'I ngoste phyI dal che myI khyod las
(97) ngan med gyIs gyang lhas thugs dgong mdzade myigIs nyes mthong pa' lagis /
(98) bcosu yodo / rnar thos pa snyIng gis ba' bzhIn 'byor cIng grubs / legs zhIng /
(99) {zhIng} skyide mo bzango / @@@ @@@ @
(100) $ :/ / lha'i sras mo mched bdun g.yung 'drung gI shug pa 'dzin pe'I lhas thugs /
(101) dgong mdzade lha'I sras mos g.yung 'drung thobo myI khyod gyang de dang 'draste tshe ring /
(102) zhIng skyid par 'ongste mo bzango /
(103) @@@ @ @@@
(104) $ :/ rgyu bar thunte lhe'u rje zIn tagI zhal nas lhas bkur na srog sra rjes bkur na /
(105) go mtho rnyas bkur rkang rIng myI cig skyes pe'i nang na 'dzangs dpal che zhes gyang /
(106) bsngag / lo cIg pas lo cIg btsan zhIng skyId par 'ongste mo bzango /
(107) @@@ @@ @@@
(108) $ :/ / lIng rgyagsta bud mo 'dzangspa bzang mo'I ngoste bud med la btab na bzang rabo
(109) skyes pa la btab na dgra yul nas slar logste mo bzango /
(110) @@@ @@@@ @
(111) $ :/ pya bunte bon po la btab na gsas dragste 'dres dang gdon gIs 'jigste / gdon mda' mdung
(112) gis babste 'chI / gsol ba' la btab na myI gnango / 'ong 'am myI 'ong ba' btab na /
(113) myI 'ong / brkal pa la btab na myI zugis mo ngano /
(114) @@@ @@ @
(115) $ :/ rdI phurte phyug lha snyer 'bum gyI zhal nas / btsandu 'dod na rje khur cIg phyugdu
(116) 'dod na dpyId nas g.yang skyongs shIg / rabs myI 'chad 'dod na rgyal po ste gsum
(117) gyI 'bangs las chung ma long shIg ji btab gyang bzango /
(118) @@@ @@ @@
(119) $ :/ lha mu tsa med gyI zhal nas / / mtshe'i sha dag la byang gi lcag bthag na / / bkrol the ma grol na' / /
(120) chad de lhung re ma skan / / spro bsring shIg / snying ma chung shIg dang legs pa dang dga' ba mchisthe mo bzang ngo / /
(121) @@@ @ @
(122) $ /:/ gar the chos bu'i zhal nas / / dgun zad gyang dpyar byung / dpyid gyI lug rid gyI rna bar khyu byug grag
(123) ste nyon mongs pa las / / skyid dbul ba las phyug / rid pa las tshos myI khyod gyang de dang mtshung
(124) ste mo bzang ngo / /
(125) @@ @@ @@
(126) $ :/ ma zeste rI dags dang rkyanggI ngoste rI dags la btab na myI sod gtor pa tsam
(127) gyI ngo myI la btab na g.yon can nang dku che dgra phyva la btab na dgra myI thubs
(128) bud med sha dag rgyo ste mo ngan /
(129) @@ @@@@ @@@@
(130) $ :/ / ha ga'de ga' smye'I ngo rta bgyogs pe'I ngo gsol ba' la btab na snyan pe'i
(131) ngo 'ong myI 'ong ba' btab na 'ong / rta bla rmang pos thugs dgong mdzade nor ji rlag pa'
(132) phyIr rnyed / rogsla khong dku ma che zhIg dang mo bzango /
(133) @@ @@ @@@@
(134) $ :/ / tog ragste lam lha'I zhal nas myI khyod 'dug na nI myi 'dug 'gro na nI don /
(135) med 'dug na nI 'gro 'dod / 'gro nI chang srin za myI la rdeg cIng dgu / dpon po la thab /
(136) mo rgal / lam rIng por gar song na yang nor myI rnyed don med snyIng gIs gdod gyang
(137) lagIs myi slebste / zhag cig bas zhag bgres par 'ong lham rdol bar
(138) 'ongste mo 'dI lan gnyIs bab na locigI dusu 'jIste mo ngano /
(139) @@ @ @@@
(140) $ :/ / spyI bar thun te yul lha pom tIng gi zhal nas / myI g.yung gI maldu chu myi
(141) 'bab / pe'u g.yunggI maldu stas myI gcab myI dmangs gyI ngoste mo bzango / /
(142) @@ @@@ @@@
(143) $ :/ / tshol ragste grIb ma la nyI ma shar rta bgyogs pa la rgya sgas bstade
(144) zhon / na chung bzang mo dang phrade snyIng dga'I ngoste gsol ba' la btab na myurdu chad /
(145) tshong la btab na tshong rgyal 'ong 'am myI 'ong ba' la btab na 'ong / grog la btab /
(146) {btab} na grogste cheste mo bzango /
(147) @@ @@@@ @@
(148) $ :/ / rtsog ngan gyI ngoste snyIng la rgyo shag sem rtsog ngan byed pa ma la mchog
(149) du mnol 'phangs myI 'o chogI snyingdu myi stugste / 'phan pa las rmang bar 'ong /
(150) phyug pa las dbul bar 'ong / chung mas byI phyinte gdon lancheste mo ngano /
(151) @@ @@@@ @@@
(152) $ :/ / lha rgyung tsa'I zhal nas rgyung tsa spun dgu'I ngoste / rmang ba' las phan bar /
(153) 'ong dbul ba' las phyug par 'ong / nyong mongspa las skyId par 'ongste mo bzango /
(154) @@ @@@@ @
(155) $ :/ lhe'u rje zin tags gyI zhal /
(156) nas lha'I sras mo mched bdun g.yung 'dunggyI nyI ma bzhIn bzhugste / gnaM
(157) gyI 'og snang dro myi la [dro?]ste kun skyid dgraste mo bzango / /
(158) @@ @ @@@@
(159) $ :/ / myI khyod chaste 'gro na lha la phyag 'tshol cIg dang lhas thugs dgongs /
(160) mdzade dgra dang g.yag la song na yang dgra thub g.yag sod / tshong bya na tshong rgyal /
(161) lha la phyag ma 'chal na 'dI kun myI 'byor gyIs lha la phyag 'tshol cIg /
(162) dang mo bzango / @@ @@@ @@
(163) $ :/ yar lha sham pho'I zhal nas myI skyid yuldu bya phab zerte thandu legs /
(164) shIng skyId myI khyod gyang gtam snyan pa thoste mo bzango /
(165) @@ @@@ @@@@
(166) $ :/ / rma sha bo'i zhal nas nyI ma myI shar be'i yuldu nI nyI ma shar thang shIng myi
(167) skye be'i yuldu nI thang shIng skye myI med pe'i yuldu nI myi phan phyugs med pe'i
(168) yuldu nI phyugs phelte mo bzango /
(169) @@ @@ @@@
(170) $ :/ / smra myI mkhan gyI ma mo mkhos bgyIs gyIs gyang myI mkhon pu la drIn /
(171) ma chagste myI khyod la sus legspa myI drante mo ngano /
(172) @@ @ @@
(173) $ :/ myI btsan tsom po na re myI bdog pa la bdog zer myI shes pa la shes /
(174) zer myI dpa ba' la dba' zer spyom pa rIde pas na phung lce sun te mo ngano /
(175) @@ @ @
(176) $ :/ jI smyide bu mo'I ngoste gsol ba' dang grog la btab na phyI dal cheste mo 'brIngo /
(177) @@ @@@ @
(178) $ :/ / rtsod purte ltang rIng gi zhal nas lamdu 'gro ba' la btab na don grub /
(179) nor nyedkhyIm na 'dug pa la btab na khyIm na myI 'dugste lam rIng por 'groste /
(180) mo gzhI'o / @@ @@ @
(181) $ :/ srog lha stam chen gyI zhal nas myI chungu la kha ma che rta chungu la kha ma dag myi /
(182) la ngan dus ma che / myI nus pa la kha ma drag / gnyen cIng sdug pas legs par
(183) bstan gyang myI nyante mo ngano /
(184) @ @ @
(185) $ :/ / brag thunte srIn mtshan dgu po'I zhal nas / myI khyod ya bdud g.yos ma
(186) srI langste phung srIn sdIgste mo nganto /
(187) @ @@@ @@@@
(188) $ :/ / snI ciste myI 'dug pa la btab na myI 'dug lam rIng por 'gro / lan nyIs /
(189) btab na jI la btab gyang lan cIg nI bzang lan cIg ni lam gyI ngoste mo 'brIngo
(190) @ @ @@@@
(191) $ :/ de skyamste grogI ngoste myI bsam pa las myI bsam pa las nor byang na /
(192) nor gnyIn myI mno ba' las zas byung na zas zhIm / dgra la btab na dgra /
(193) thub / rI dagsla btab na sode mo bzango /
(194) @ @@ @@@
(195) $ :/ / spe slode chung ma la btab na chung ma bzang mo zas byas na rtsI gos byas
(196) byasna nordu rede chung ma la btab na bzang / skyes pa la btab na ngo dmaste mo 'bringo /
(197) @ @@@@ @@@
(198) $ :/ dpal po mthong chen gyI zhal nas myI 'tsho nI dpal gyi 'tsho bya 'tsho nI
(199) god gyIs 'tsho myI ngan dpal che ral ngan mtshon no dpalgyIs thugs dgongs
(200) mdzade tshe rIng srog sraste mo bzango / /
(201) @ @@@ @@
(202) $ :/ rIng snyade yar lha sham pho'i zhal nas lha dgu thugs glod gyIs lha la
(203) phyag 'tshol cig dang tshe rIng srog sra jI pyar jI rung gsol ba' la btab na gnango
(204) tshong la btabna dum / jI la btab gyang mo bzango /
(205) @ @ @@
(206) $ :/ / bu la btab na khye'u ngo bon po zhIg na 'dre gdon gyIs 'jIgs / gzhan na dang
(207) po nus snyam sem tha mar lam rIng por byungste mo 'brIng smado /
(208) @ @@@@ @@@@
(209) $ :/ / sha med gangs dkar gyI zhal nas myI khyod nyam che phral dragIs dgra dar
(210) ma'I ngo 'on cIg rkya skyen phongs gyIs rI dags dar ma'I srog chod cIg lha thugs
(211) dgyes gyIs snyIng la bsams pa bzhIndu 'ongste mthar skyIde mo bzango /
(212) @ @@@@ @@
(213) $ :/ / ngo sa khu bar'I zhal nas 'brug dog dgu lha gshegs re ma skad dog ni
(214) dog myod gyong snyIng ma chung zhIg dang nyes pa myI byung gyIs sngangs pa lan nyIs
(215) tsam byungste mo 'bringo /
(216) @ @@@ @
(217) $ :/ / ru sod chunguste phyI dgra chungu zhIg 'dzu nang dgra chungu zhIg 'dzu myIg zhig za'
(218) srog phyva la btab na mo 'brIngo /
(219) @ @@ @@
(220) $ :/ myI zhig lam rIng por song na don med lam bkyon don med bu lon ma
(221) gsol btab na myI gnang / rta 'ang rlagste phyIr 'ongs nas mo ngano /
(222) @ @ @@@
(223) $ :/ / lha byI rje'i zhal nas log pa dang slad pa nI myi nyan tshong bya na myI dum
(224) don gnyer na myi phyIn gsol ba' la btab na myI gnangste ste mo ngano /
(225) @ @@@ @@@
(226) $ :/ / sla bo sla sras gyI zhal nas myI phyva bros na g.yang lon cIg rta rlag
(227) rtas 'tshol cIg / g.yu chag na gsor gyIs sob cIg pya bun gyI phyva blan na bzango /
(228) @ @@ @@@@
(229) $ :/ / lha thun 'tsho'i zhal nas lha thugs dgyes gyIs / myI khyod nor phyugs jI
(230) 'dod pa lhas stsalto mo bzango /
(231) @ @@@@ @
(232) $ :/ dgra dar ma 'I ngo 'ang ma lon rI dags dar ma'I srog gyang ma bcad /
(233) dgra dang phrad na dgra kha drag po dang phrad yul na myI bsam pa las dgra byung /
(234) na dgras lhog pas btabste mo ngano /
(235) @ @@ @
(236) $ :/ / gram grumste mkhon dang dbar gyI ngoste snyI la pya dgu legs snyam
(237) sem mod gyong ma legso / gdon dang mkhon bar mang du yode mo ngano /
(238) $ :/ / stagI lo'I bka' sho byung be'i sho tshIgs gyi zhus lan / pho brang nas mchIspa / /
(239) $ :/ stagI lo'I sho tshigs las / / stagI lo'i dbyar sla 'brIng po tshes drug phan cad /
(240) zhes byung 'o 'tshal / shos chod ces byung na / snga dro phyI dro dag las mchId myi mjal pa mchIs na /
(241) snga dro phyi phyI dro gang gI tshigs brtsan bar bzung bar 'tshal / / kha mar las tshes drugI /
(242) gdugs bas gyI tshigs gyIs zung shIg / sho tshigs snga ma dag las myI zhIng dang khyIm sho ma /
(243) ma mchIs pa skad gsang bar 'byung na / myI zhing khyim la shos gcad dam myi gcad / mchid myi
(244) {myI} mjal pa mang na mchId myi mjal pa phal che / shos gcad dam myI gcad ji ltar 'tshal /
(245) zhIng khyim myI stagI lo'i sho tshigs dang sbyor la zhing khyim myi ji 'ogdu song yang shosmyi /
(246) chod gyIs slar bdag po stsol cig / par byung gIs de dang sbyor cIg / bka' sho'I sngun /
(247) roldu bud med bag rgod bgyIste / da' ltar pha myIng la gnas zhIng mchIs pa / khyIm thab
(248) gyis nI myi btang bar gsol / pha ma dang dngos gyIs nI thog ma yang mchId maMjal pas da' /
(249) rung yang mchId mjal parmyI 'byung gis / glud 'tshal par yang gsol ba' mchIsnan ji ltar
(250) 'tshal / / kha mar las / bardu rang reng 'tshal pe'I chad pa ni ma mchIs / dngos ni khyIm thab /
(251) stsol cIg / / bla 'ogI bu londu gyur pe'i rnams shos myI gcado zhes byung na / bu lon gyi /
(252) gyur ded pe'I mchid nas nI gyur yang bu lon shos myI gcad pe'i nang 'du 'du / khrin ma lags
(253) pas bka' shos myI gcad par gsol ces mchI / chags pe'i khungs po'I mchId nas ni bla
(254) 'og bu lon shos myI gcad par 'byung gis / gyur shos myi gcad par yang myi 'byung
(255) la / gyur ces bgyi ba' bu lon dngos sho ma lagste / sngar bu lon dusu ma phul pe'i nongs
(256) pe'i chad par gyur pas / 'dI yang nyes che phra 'dra ba' / chad pa 'gum spyug man cad
(257) la thug pa / thugs dpag mdzad pe'i bka' shos gcad par gsol ces 'byung 'ba'di rnams
(258) gang ltar 'tshal / kha mar las byung ba' shos gcad par 'tshol cIg / / nongs skyon mchIs pa
(259) dang / 'og dum bgyis pa lastsogs pa / 'ogdu tshongsu bgyis pa bu lon chagspa snyadu dam rgya
(260) las khungs po'I mchId nas nI / tshongsu bgyis pa ma 'am bu lon dngos chags pa
(261) chags pa ma lags pas shos gcad par gsol /
(262) ded pe'i mchid nas nI / dam rgya btrun shos myi gcad par gsol ces mchi 'dI nyis gang
(263) ltar 'tshal / / kha mar las [dpyophala?] bu londu gyur na shos ma gcad cIg / / bzhag btam lta
(264) bo shos myI gcad ces 'byung ba' / mya dang rkang 'gros dang nor rdzas gnag rta lastsogs pa /
(265) btams pa las / bka' shogdu blangs nas / bzhag pe'i mchId nas 'di / bka' shos nI
(266) myI khums na / dngos ma mchIs na skyin khrin lta po shos dgum 'am myI 'gum / / ji ltar 'tshal /
(267) kha mar las bu lon shos myi gcad par 'byung bas shos myI gcad par 'tshol cig /
(268) sho tshigs gyI yan lag las / pho brang khor gyi zhal ce [pe (/po)] sar zhus pa / phyI blon sa
(269) nas dgyIgste zhus pa / mchId gyis gcade / zhus pe'I zhus lan / bka' sho'I sngan rol
(270) du bud med khyIm thab mchIs pa gzhan gyis brkus phrog nas / da' ltar 'tshos pa lta
(271) bo / bdag po snga ma ngo lendu stsal tam / 'tshos myI dbral bar myI skyin stsal tam ji
(272) {jI} ltar 'tshal / rta'I lo'I sho tshigs gyI zhus lan las 'byung ba' / bud med bdag po dang /
(273) dbang pos 'tshong la dbang pa' / ma lags pa / phrog pa dang brkus pa lastsogs pa myi /
(274) dbang bas 'tshos pa rnams khrIn ni shos chod / bud med dngos nI slad gyis / 'tshos
(275) pa dang 'tsho myI dbral bar gzhag / / myI zhIng khyIm la sho ma mchIs gyis / myi skyin
(276) na tshad 'dra re re phob shIg / / myIg mar las rta'I lo'I sho tshIgs gyi dpe 'a
(277) gsel ba' lagste / 'dI lta bu khyIm thab ma mchIsu lags gyis gyang / khong ta sun
(278) pas slar 'tsho zhing 'du ba' la myI phan bas / rta'I lo'I sho tshIgs zhus lan 'dI bzhIn mdzad /
(279) pe'i rIgs / kha tshem dang bang tshes lta bo da' ltar 'tshos pa lta bo nI / cang ma lags
(280) gyIs / tha snyad 'dog ba' dang / mo reng nI shos chod par yang bas / dngos nI lendu stsal
(281) pe'i rIgs / myI dbang bar brkus pa dang / thugs thubdu btsongspa'I rnams / khrIn ni shos
(282) chod na / dngos 'tshos dbral 'am myI dbral sho tshigs las gsang las gsang bar
(283) myi 'byung na jI ltar 'tshal / / myIg mar las zhal ce pas zhus pa / bud med khyim
(284) thab mchIs pa las / gzhan phrog pa dang brkus pa lastsogste / sngar myIg mar
(285) gongdu gsol be'i nang 'du 'du zhIng mchIs / / kha mar las rta'I lo'I sho tshigs
(286) gyI zhus lan las 'byung ba' 'bzhIn 'thsol cIg / /chIbs shul gong
(287) spa dang sde bas / zhang lon dang 'tshal zas phor mnos pa gum pa dang stor pa
(288) skyIn ba' phab nas / bkye bskyon ba' / stor ba' dang gumbe'i mdo rIs blar ma phu
(289) bar yang bas na / gum nas mdo rIs ma phul ba' lta po / phor 'tshal 'tshal pas
(290) gsol na / bkye bskyon lta bu chad khrIn thebs lags zhes bgyI ba' 'dI lags / stor
(291) stor lta bo myIs nongs pa yang ma lags / gum ba' mdo rIs phul ba' bka' shos bcad
(292) par gsol / na / jI ltar 'tshal / rta'i sho tshIgs las byung ba' mchIbs phor mnos pa dang
(293) g.yar por btang ba' nI bzhag btam pa dang 'draste shos myI 'tshod / pho dang g.yar pa las
(294) gum storte / chad khram btab dang phyi khungs dang nang khungs las chad pa nI shos gcado /
(295) zhes 'byung / / myIg mar las phor phog pa dang g.yar pe'i skyIn khrIn / rta'i lo'i
(296) zhu lan lam shos gcad par 'byung / gIs gyang / bka' khrims gyIs skyin ba' bda'
(297) bar 'byung pas sbyangste gum stordu gyur na / bla 'ogI bu londu 'gyur pas / shos myi
(298) gcad pe'i rIgs / / zhal ce pas zhus pa las mdo rIs mchis mchIs pa
(299) ma mchIs zhes bya ba' nI stor pa la ni yong yang ma mchIs / gum ba' la yang
(300) chab gyIs 'tshal pa dang / khyI spyang gIs 'tshal pa dang / stor pa yang mchIs pa
(301) zhIg mchIs na / gum stordu gyur tam ma gyur ba' nI spyang be'I nang du 'du bas
(302) mdo rIs mchIs ma mchispa myI rma be'i rIgs / / kha mar las shos myI gcad
(303) par 'tshol cIg / bka' sho'I sngun roldu bkon mchogI dkor pa las zhal ce
(304) brtsad bzung ba'I khrin nI shos chod 'dkor gyI dngos 'jal ba' slar ma
(305) phul pe'I skyin bar gda' par lha rIs gyI dpon snas gsol ba' dag gyang
(306) mchIste / sho tshIgs 'dI las gyang gsang bar myi 'gyung na shos gcad dam myi gcad ji
(307) ltar 'tshal / rta'i lo'I sho tshIgs gyi zhu lan las 'byung ba' / mgon mchog dang
(308) dge 'dun gyi dkor las 'bangs phal la chags pa dang / 'bangs gyI bu lon bkon
(309) mchogsdang / dge 'dun spyI sa / chags pa dar ma'I gzhung dang gtugs na /
(310) bka' shos gcadu myI rung bar 'byang gIs sog 'tshal dngos [dngo]su phul
(311) cIg / dngos dngosu myi 'byor na rIndu phul cIg / gyur dang skyed nI shos gcado /
(312) dge slong gI rdzas sa dang lha 'bangs rnams nI 'bangs phal dang 'dra shos
(313) gcado / zhal ce lastsogs pa khrin du rma'o 'tshal bkon mchog man cad gyi shos
(314) gcado / bkon mchog gsum gyI dkor las bskyIs pa dang bun skyed btang
(315) dngos nI shos myI gcado / bun skyed dang chad khrIn nI shos gcado / dge slong sgo sgo'I
(316) 'bangs phal dang 'dra'o / / myIg mar las rta'I lo'i sho tshIgs gyI dpe 'ang gsol
(317) pa lagste / bkon chogI dkor gyI gyur skyed dang khrin nI shos gcad / dngos nI
(318) shos myI gcad par sho tshIgs gud las thun par 'byung bas
(319) 'dI yang shos myI gcad par mdzad pe'I rigs / / kha mar las rta'i lo'I
(320) sho tshigs 'gyI zhu lan las 'byung ba' bzhin 'tshol cIg / sho tshIgs
(321) ngos chad dang gdIng chad lastsogs pa ser la thebs pa khram nag la thebs pa dang /
(322) dmag myI lo bun gyIs bcad pa dang mkhar tsud lo chags pe'i rnams / shos
(323) gcado zhes byungste / chad pa nI bka' shos khums par yang bas / rje blang ngo
(324) blang 'tshal tam myI 'tshal / kha mar las dmag dang mkhar tsud bcad pe'i
(325) rnams cad pa yang shos chod dngos gyang gzhI gzhi la mchIs / dper na tshI gu
(326) stag ru la gtogs pa lta bu lo rtsis ma bgyIs pas ser la nI ma thebs
(327) sog sa che chung da jag rongdu brtsis pe'i chad byang las byung ba' ni sho tshIgs
(328) las sngan cad nyes byungo chog shos gcado zhes byung bas khrin yang bka shos
(329) chod gzhI gzhi la yang mchIs par gnango / sta'I lo'I sho tshigs gyI yal ga'
(330) las pho brang khor gyI zhal ces pas / zhal ce'i pe'I sa nas zhus
(331) las / phyI blon mar dgyIgste mchId gyis bcad pa / / bka' sho'i sngan
(332) roldu / rje blas rkyar btuste / gzhI bus brdzangs pa las dmag myI rje blas
(333) bcad pa dmag chad dngos nI khrin myi rma bar bka' sho'i tshigs las
(334) gyang 'byung na / dmagmag rdzangs lta bo / dmag god thob pas / thus
(335) slad ma'i tshe 'ang rdzong 'tshalte / 'tshal tam / slar 'buldu stsal /
(336) kha mar las 'dI lta bsdu be'i rIgs sam myi rIgs / phyi blon gyIs
(337) dkyIgste gsol cig / myIg mar las 'byung ba' / [mun (/sun)] dmag btus
(338) pe'I rtsis mgo dang bla'I bka' gsung ba' dag dang sbyar na / [mun (/sun)]
(339) [mun (/sun)] dmag gzhan kun bsdu / rkyar btab pe'i sgos rdzong 'dI lta bo rdzang
(340) gzhan la dbab par nI ltang bur bab pas da' ltar / stong sde so'i 'og
(341) nang srId du bgyis nas bcu tshan dang khram tshan gyIs rdzong ba' du mchIs
(342) da' dmag chad shos khums pe'i dmag rdzong ded pa ni spyi mangdu mchis
(343) pa yang 'dra / dmag chad dngos gyI bka' chad nI shos khums par yang
(344) bas na / gzhI bus brdzangs pe'i rdzangs lta bo khrims gyIs dmag myis
(345) dpangste / thog ma gzhI bo las 'gug pe'i tshe yang gtandu stsal pas
(346) dmag myI nor lagste / bka' sho ma byungdu lags gyIs gyang dmag chad
(347) 'gum 'am spyugs na / bu smad kun yang khrIn gyI bka' chad la /
(348) thug pas / gzhI bus rdzangs bdar ma mchIs pa lagste 'dI yang rmyIg
(349) dang sbyar na / bu londu yang myI 'gyur la / da' ltar gzhI bus bda'
(350) ba' / yongs 'bangs khrog par 'gyur pas rdzangs gyI rnams gyang
(351) shos gcad par mdzad pe'i rIgs / gong du gsol pa bzhIn shos gcad
(352) par mdzad na / gzhI po'i sun dmag gyang godu ma chud pas / bu bran btu
(353) be'i 'os mchIs pa mchIs nI dmag myi 'ang bab / rdzings gyang nyI rimdu
(354) du 'jalte pham yang rab na / bka' chad dang 'da bar gyur pa dmag chad
(355) lta bo 'gum spyugs la thug pa yang khrin chen po yang bka' shos /
(356) khums / rkya 'ang bka' shos dgum zhIng rkya yuldu ma bsnan pe'i /
(357) rIgs sam myi rIgs / / kha mar las dmag chad rnams rkya god
(358) stsal par myI gnang gIs dmag nI gzhi la snon cIg rdzangs ni
(359) bu londu gyur pas shos ma chod gyis gzhi bo slar stsol cig /